Кадамжай районунда жаңы социалдык объект – заманбап жалпы билим берүү мекемеси ачылды

2025-жылдын 29-август күнү, Кыргыз Республикасынын Эгемендүүлүгүнүн 34 жылдыгына карата, Кадамжай районунун Майдан айыл аймагына караштуу Сары Алтын айылында курулган “Сары Алтын” орто мектеби 225 окуучуга ылайыкталган заманбап шарттагы билим берүү мекемеси катары ишке берилди. Бул жаңы мектептин ишке берилүүсү айыл тургундары үчүн чоң кубаныч тартуулап, билим берүү инфраструктурасын жакшыртууга өбөлгө түздү.

Ачылыш аземине Кадамжай районунун мамлекеттик администрациясынын башчысы – аким Б.Баяке уулу, жергиликтүү бийлик өкүлдөрү, мектеп жамааты, айыл тургундары жана окуучулар катышты.

Аким Б.Баяке уулу өз сөзүндө: Кыргыз Республикасынын Эгемендүүлүгүнүн маңызын белгилөө менен катар, жаңы мектеп – бул жөн гана билим берүү жайы эмес, бул — келечектин муундары үчүн ишенимдүү пайдубал, алардын сапаттуу билим алып, руханий жана интеллектуалдык жактан өсүүсү үчүн кеңири мүмкүнчүлүк экенин ошондой эле жаштардын мекенчилдик сезимин жогорулатуу менен аларды билимдүү, жоопкерчиликтүү жарандар катары калыптандырууга өбөлгө түзөрүн белгиледи.

“Сары Алтын” орто мектеби бардык керектүү шарттар менен жабдылган – жарык жана кенен класстар, физика-химия лабораториялары, информатика кабинети, китепкана, спорттук зал жана санитардык талаптарга жооп берген бөлмөлөр менен камсыздалган.

Бул билим берүү мекемеси Сары Алтын айылынын эле эмес, жакынкы айылдардын да балдары үчүн билимге болгон жеткиликтүүлүктү камсыздайт. Мектептин ачылышы менен балдар заманбап, коопсуз жана ыңгайлуу шарттарда билим ала алышат.

Мындай объектилердин ачылышы райондук деңгээлде гана эмес, өлкөнүн жалпы социалдык-экономикалык өнүгүүсүнө кошкон салымы катары бааланат.