Кадамжай районунун тургундары үчүн медициналык тейлөө дагы да жеткиликтүү болду – районго жаңы гемодиализ борбору ачылды.

III Элдик курултайында Кадамжай районунан барган делегаттар тарабынан көтөрүлгөн маанилүү маселелердин бири – бейтаптар үчүн гемодиализ кызматтарынын жеткиликтүүлүгүн камсыз кылууну уюштуруу жөнүндө.

Ушул маселени чечүү максатында бүгүн Кадамжай районунда жаңы “Глобалдиализ” гемодиализ борбору ишке киргизилди. Бул Кадамжай району боюнча үчүнчү гемодиализ борбору болуп саналат.

Эми Кадамжай районундагы 86 бейтап мурдагыдай 50 чакырым алыстагы гемодиализ борборуна каттабастан, өз аймагында сапаттуу медициналык жардам алууга мүмкүнчүлүк алышат. Бул бейтаптар үчүн чоң жеңилдик болуп, алардын жашоо сапатын жакшыртууга өбөлгө түзөт.

Гемодиализ кызматтарын көрсөтүүчү борборго акы республикалык бюджеттин эсебинен төлөнөт. Бир сеанстын баасы 6500 сом. Гемодиализ борборлору тарабынан 5 баскычтагы өнөкөт бөйрөк жетишсиздиги менен ооругандарга көрсөтүүлуучү гемодиализ кызматтарынын сапатын контролдоо жарандарды базалык мамлекеттик жана милдеттүү медициналык камсыздандыруу жаатында мамлекеттик саясатты ишке ашыруучу орган тарабынан ишке ашырылат.

Ачылыш аземине Кадамжай районунун мамлекеттик администрациясынын башчысы-аким Б.Баяке уулу, мамлекеттик мекемелердин жетекчилери, медицина кызматкерлери, бейтаптар жана Кадамжай шаарынын мэри А.Мурзажанов катышып, бул борбордун ишке кириши район үчүн өзгөчө мааниге ээ экендигин белгилешти.